Nis faza e re e seminareve kundër dukurive negative në futboll

Nis faza e re e seminareve kundër dukurive negative në futboll

Federata e Futbollit e Kosovës nëpërmjet zyrtarit të saj për integritet të garave, Gazmend Bojniku, ka vazhduar me ciklin e ri të seminareve, që kanë për qëllim ndërgjegjësimin dhe luftimin e dukurive negative, siç është trukimi (kurdisja) e ndeshjeve në futboll.

Të rikujtojmë se seminaret e tilla janë pjesë e planprogramit të UEFA-s dhe secila federatë anëtare e saj është e obliguar të organizojë seminare ndërgjegjësimi së paku një herë në vit me të gjitha nivelet dhe kategoritë. Seminaret tashmë janë mbajtur në Prishtinë me grup-moshat e reja; U13, U15 dhe U17. Derisa në ditët në vazhdim do të organizohen seminaret edhe në rajonet e tjera me grup-moshat e sipërshënuara.

Gjatë këtyre seminareve zyrtari i FFK-së për integritet të garave ka ligjëruar para pjesëmarrësve për mënyrën se si duhet të veprojnë në rast se përballen me njerëz që synojnë trukimin e ndeshjeve, si dhe për zbulimin e disa rasteve kur kanë qenë të përfshirë lojtarët, trajnerët dhe zyrtarët e klubeve.

Pjesëmarrësit e këtyre seminareve kanë ndjekur nëpërmjet videoprojektorit disa shembuj të ndryshëm që lidhën me trukimin e ndeshjeve, derisa më pas pjesëmarrësit janë ndarë në grupe punuese, ku kanë dhënë përgjigjet në pyetësorin e krijuar nga UEFA dhe FFK-ja.

Po ashtu të gjithë pjesëmarrësit janë pajisur me fletushkën e re, e cila është hartuar bashkërisht me zyrtarët profesionalë të UEFA-s, që përmban informacione koncize, duke përçuar porosi të qarta në lidhje me parandalimin dhe luftimin e trukimit të ndeshjeve./rtvokarina/